Friday, February 24, 2012

KPM Ngungkupka RM9 Miliun Kena Ngemanah Serta Nyeruri Sekula


BINTULU: Opis Menteri Pelajar (KPM) begunaka pemadu kurang RM9 miliun dikena ngaga sereta ngema­nahka rumah sekula ti balat endar udah repuk ketegal indu utai ba menua tu.

Sapit Menteri opis nya Datuk Dr Wee Ka Siong madahka, penyampau sekula ti begunaka belanja nya enda mayuh, tang opis menteri pelajar nguji deka mutarka semua penanggul ke bekaul nya.

Ku iya, sekula ti udah ngenataika peminta ngulihka belanja nya patut berunding chara ke manah ngatur belanja nya laban kededua piak patut bekerejasama.

“Aku enggau naka pemen­dar nguji ngulihka belanja nya, tambah mega lis semua sekula deka diberi ngagai Sapit Menteri Besai ke lalu nyadi Menteri Pelajar iya nya Tan Sri Muhyiddin Yassin.

“Tan Sri Muhyiddin ma­dahka, belanja ke chukup deka diberi ngagai Komiti Pengatur Sekula (LPS) un­gkup projek nya tang semua duit pengatur sekula nya deka dikemataka enggau manah.

“Kena 5 haribulan ninting bulan, LPS enda tau enda nganjung riput sida sentang pekara nya,” ku iya lebuh ke bejaku ba aum media sepen­gudah dialog begulai enggau Kaban Komiti Pengatur Sekula Cina sereta bala pen­gari Sekula Cina (SJK) ba SJK Chung Hua Bintulu No.2 ditu ensanus.

Ku Dr Wee,Opis Menteri Pelajar deka mantu sekula ba Sarawak nyengkaum mission school, ngemanahka pereng­ka guna ngambika bisi dikena nembiak ba sekula nya.

“Sarawak deka nerima mayuh agi belanja sereta ke pemadu mayuh enti diband­ingka enggau menua bukai. Belanja nya ukai semina ‘goodies’ tang bantu ke patut ari perintah,” ku iya.

Iya mega madahka diri udah ngabas nyauka semua sekula SJKC bantu perintah ba menua Sarawak lalu bisi sekula udah nerima belanja RM140,000,. Ngena belanja nya, semua penanggul sida teputar magang.
“Naka ke diatu, peminta 147 buah SJKC sekula bantu perintah ba Sarawak LPS deka disarap silik agi ,” ku iya.

Chara nya meh ke pemadu manah laban perintah endang amat ngemeratka pelajar sekula ba menua Malaysia.

“Isu kelas ke sekut dalam kelas tambahan sereta bangku enggau perengka ke bukai mega udah diputarka ngena belanja ke diberi nya ,” ku iya.

Lebuh ke ngenang sebana sentang pemanah pengawa kontraktor ke nyaga pemeresi ba sekula, Dr Wee madahka iya tekenyit endar ati ninga kontraktor enda mayar gaji pengereja pengawa sida, ti ngujungka sida enda datai ke sekula ngereja pengawa.

Iya udah minta Opis Pelajar Menua mutarka pekara nya enggau kontraktor ke bekaul nya.

Lebuh ke ngenang pen­emuai seraya ke gawa iya ngagai menua tu, iya madahka penemuai iya nya besai endar reti laban ulih ningaka sebana sereta pengarap ati sida ti bepintaka belanja nya.

“Aku ningaka sebarang sebana ti dikenataika LPS, baka peluang pengajar ke udah graduate, ukai graduate enggau mayuh macham agi.

“Terima kasih ngagai ket­uai politik laban udah man­taika langgur penemu ngatur pengawa betemu ke baka tu ti meri peneleba ke chukup manah.

Tambah mega ari nya tadi kitai nemu sekula ke patut dibantu, kati chara belanja suba dikena sida lalu nun­jukka chara ti pemadu manah ngetanka penegap JPN eng­gau LPS,” ku iya.

Sama bisi enggau iya Kaban Dewan Negara Senator Pau Chiong Ung sereta Sapit Pemesai Opis Pelajar Pelilih Mit Menua Bintulu Abdul Muin Abdul Kassim.

- UB

No comments:

Related Posts Plugin for WordPress, Blogger...