Friday, March 16, 2012

STU Mujur Ngatur Seminar Ngerembaika Profesyenalism dikena Nyagu Tikas Profesyenal Pengajar


SARIKEI: Serakup Pengajar Sarawak (STU), ujung minggu tu tadi udah ngatur Seminar Ngerembaika Profesyenalism ngagai 88 iku bala pengajar ari pelilih mit Sarikei enggau Bintangor.

Program nya diatur dikena ngiri penemu ngagai raban nya senentang chara-chara ngangkatka pengawa nyadi pengajar ngambika sida manggai ba tikas profesyenal.

Chairman STU Bagi menua Sarikei, Claudius Liew Sze Kiong, ke lalu nyadi Chairman Pengatur seminar madahka, seminar nya sebengkah ari chara dikena negapka pengeliat ati seseiku pengajar nya.

“Kami arapka tembu ngulu seminar, semua raban tu teulihka mayuh penerang ke beguna ngambika bisi dikena sida lebuh bejalaika tanggunpengawa nyadi pengajar.

“Berebak enggau nya, kami mega arapka semua pemadah enggau penemu ke diulih sida sepemanjai seminar, tau dikunsi enggau kaban ke bukai ngambika bisi dikena nyaut peminta enggau juluk besai pelajar menua Malaysia nempa modal mensia ke bekualiti nengah bidang pelajar,” ku Claudius ngagai pengarang berita, ensanus.

Kelimpah ari nya ku iya, seminar nya mega nyempilka bala pengajar enggau penerang ke bekaul sentang chara ngena perengka teknologi moden enggau iya ke diatu.

“Enti sida meretika pekara nya, bala pengajar enda tinggal ba arus pemansang teknologi moden laban nembiak rebak baru jampat belajar sereta nguasa pekara nya,” ku iya.

Ba pengujung seminar nya, bisi diatur pengerami nyuka setipikit ngagai semua ke enggau ba seminar nya.

- UB , 13 Mac 

No comments:

Related Posts Plugin for WordPress, Blogger...