Thursday, October 25, 2012

Jabu Ngarapka Palan Pematih Betanam Betupi Sarawak Diungkup Ngelui RM1.5 juta


KUCHING: Palan Pematih Betanam Betupi Sarawak (IPS) deka berengkah ngambi urung 100 iku nembiak ninting taun dikena napi peminta pengereja pengawa dalam industri nya jemah ila.

Sapit Kepala Menteri ti mega Menteri Betanam Betupi Moden Datuk Patinggi Tan Sri Alfred Jabu Numpang madah, kenyau ari taun 1985 IPS semina ngambi nembiak belajar ba palan nya dua taun sekali.

Iya madah, timpuh ngambi nembiak masuk IPS patut diubah ngambi ulih nambahka pemayuh pengereja pengawa ke guna industri betanam betupi nengeri tu.

“Sepenembu pengawa ngemanahka IPS ti deka berengkah taun tu ila, palan pematih nya deka ngambi 100 iku nembiak ninting taun, ti nyendiaka mayuh peluang ngagai nembiak ari menua pesisir, ulu sungai, kandang nebing tasik nyengkaum nembiak bansa Penan belajarka industri betanam betupi.

“Aku arap bendar perintah ngagihka lebih RM1.5 juta dikena ngemanahka rumah, hostel, sereta sekeda perengka ke patut dikemanah dalam IPS tu dikena napi pemayuh nembiak,” ku iya ti mega Menteri Pemansang Menua Pesisir

Iya mansutka pekara nya maya aum pengarang nyerumba Pengerami Konvokesyen Betanam Betupi 2012 ke diatur Opis Betanam Betupi Sarawak ba Balai Mayuh Guna IPS Semongok ditu kemari.

Kelimpah ari nya iya mega madahka penyampau stesyen betanam betupi di Sarawak mega deka diidup sereta ditambah setipak enggau guna sektor betanam betupi Sarawak.

“Ke diatu kitai bisi 48 stesyen betanam betupi, lalu merambu deka nambah urung 10 agi stesyen nya, lebih agi di menua pesisir,” ku Jabu seraya madah nyengkaum di pelilih menua Roban, Julau, Sarikei, Saratok enggau ke bukai nitihka pematut.

Dulu ari nya, iya nyuaka setipikit ngagai 86 iku graduate IPS Sesi 2010/2012 ke nyengkaum 62 iku graduate ngambi Setipikit Betanam Betupi Malaysia enggau 24 iku graduate Setipikit Akuakultur ke nembuka pelajar dalam dua taun ba IPS.

Nambahka nya, bisi 10 iku graduate keterubah tauka pemungkal ke tembu latih ‘Keusahawanan Bakeri dan Sejuk Beku’ pengelama enam bulan nerima setipikit.

Nitihka penerang Ketua Penolong Pengarah Bahagian Perikanan Boniface Litis dalam jaku pengelalu madah, berengkah ari penumbuh IPS taun 1985 nyentuk ke diatu IPS udah nempa 981 iku graduate.

“Ngarapka semua penemu enggau pengelandik ke dipelajar sepemanjai dua taun ba IPS dikena mantu perintah ngubah sektor betanam betupi ngagai industri ti ulih besemekih enggau maju kena napi peminta guna menua tu enggau makit dunya.

“Aku mega ngarapka penyereta kos Keusahawanan Bakeri dan Sejuk Beku ulih nyadi orang dagang ti bepengelandik,” ku Boniface.

Sama datai ba pengeram nya kemari, Menteri Muda Betanam Betupi Datuk Mong Dagang, Kepala Pengajar IPS Rapoi Sidop enggau pemesai bukai.

- UB

No comments:

Related Posts Plugin for WordPress, Blogger...